الدرامي عبد الله عبد السلام (فضيل) : بجيبوا لينا وزراء ما عارفين معنى الثقافة

حوار : ساجدة دفع الله

الحكومة الأنتقالية اسوأ الحكومات.. وحمدوك طلع روحنا
معجب بأبوبكر فيصل وما بقدر أقيف قدام محمد عبد الله موسى
وهذه (…..) قصة “الهبوب التقد نعالك”

يظهر بذيه السوداني (الجلابية – علي الله – الصديري- العراقي)، يقطي رأسه بطاقية يختار لها ألواناً في كل مرة، بهذا الشكل (البلدي) يغذوا الممثل السوداني والدرامي عبد الله عبد السلام الشهير بـ(فضيل) الإنترنت ويدخل البيوت المحلية والعالمية العربية، ينثر الضحك بقفشاته وتعليقاته الساخرة، جعل من نفسه نجماً محبوباً في الأسافير والشوارع.
فضيل اختار لنفسه طريقة تمثيل فريدة ومختلفة ربما غيرت الواقع من نقل طيبعة الريف إلى المدينة إلى العكس فكثير من قفشاته وتعليقاته نجدها تتداول بين أكثر المجتمعات تمدناً وحضارة.
(المواكب) اختطفت فضيل لساعات من جمهوره لتظهر وجهه الآخر عبر صفحاتها فالنتابع ماذا قال:-
حوار: ساجدة دفع الله
مشاكل الدراما السودانية؟
مشكلة الدراما في السودان 80% انتاجية، ولعمل دراما تؤثر في المجتمع، وتنقل عاداتنا وتقاليدنا وسياحتنا للعالمية، ولترعاها الدولة لازم يأتوا بوزراء يفهمون الثقافة ودورها في المجتمع، وللأسف (نحن بجيبوا لينا وزراء ثقافة ما عارفين الثقافة معناها شنو ذاتو).
لماذا لا تكون المشكلة سيناريو ونص؟
لا ليست سيناريو، لان النص حله سهل جداً، وهو إقامة ورش للكُتاب، ويتم فيها تبادل الخبرات، ولكن نحن ماعندنا حاجة اصلاً عشان نعمل ليها ورش تدريبية، وكتابنا فيهم شوية كسل.
الدراما السودانية محلية فقط هل تتفق معي؟
هي كانت محلية ولكن بفضل وسائل التواصل الاجتماعي اصبحت عالمية، ومافي زول في الدولة عنده يد في نقل درامتنا للعالمية.
رغم شهرتك لكن مازلت (محلي بحت)؟
لا اقول أنني عالمي، ولكن مجموعة فضيل تُشاهد في كل الدول العربية بدون استثناء، وكيف نقتحم العربية اذا كانت أقل تكلفة عمل درامي أكثر من (12) مليار، نجيبها من وين، فهي المشكلة انتاجية، بالإضافة لمشكلة الكُتاب ولابد أن يكون الكاتب مطلع على العادات والتقاليد وبثقافة الدولة التى يعمل بها،( ماممكن اجيب لي كاتب من أمدرمان اقول ليهو اكتب لي عن تشاد).
إذن أنت تتهم الكُتاب بالتقصير؟
لا لم اقصد ذلك ولكن هذا تقصير من الدولة، ويمكن للدولة عمل شراكات مع السفارات لتطوير الدراما في السودان، وكل الفرق التى تسافر للخارج بإجتهاداتها الشخصية وليس من الدولة.
فضيل دائما في دور الرجل التقليدي وليس ود الخرطوم لماذا؟
كل الدراما تحاول نقل المدينة للريف، وبعد أن عملت قناتي على اليوتيوب دخلت في تحدي وقلت لهم 🙁 أنا بجيب المدينة في الريف، ولو ما خليت ليكم الود الحنكوش اتكلم ريفي يبقي رسالتي ما وصلت)، وما في زول ود مدينة كلهم من الريف .
هل يمكن أن ينجح فضيل في شخصية برجوازية؟
نعم ينجح، والدليل شخصية القاتل التى مثلتها في فيلم الزينة، وجدت انتقدات حادة من الشارع، (يوم ماشي في الشارع جاء واحد قرب يقبقبني قال لي يا زول دا شنو البتعمل فيهو دا، ومنو قال ليك نحن عايزنك تمثل كده) وهذا يدل على أن الشخصية نجحت مادام هذا الشخص كرهها، وليس لدى مانع في تمثيل الطبقة البرجوازية اذا وجدت النص.
وما رد فعلك وقتها؟
في الأول اتخلعت، ولكن بعد فهمت الموضوع قعدت اضحك وبقيت بهدي في الزول، واقنعه بأن هذا تنوع في الشخصيات.
معجبينك هل يقتحمون اوقاتك الشخصية؟
أنا بحب يقتحموا اوقاتي الشخصية، وما تتخيلي بحب اللحظات دي كيف، بجوني في البيت أسر وأفراد، فزول حباك لمن جاب اولاده وجاء اتصور معاك لا اعتقد أن ذلك له ثمن، ومافي حاجة اسمها وقتك الشخصي بعد أن اصبحت شخصية عامة، أنا بستقبل أي شخص في أي زمن في إحدى المرات (جوني ناس الساعة 10 مساء قالوا نحن مسافرين بكرة، وجينا مرتين ما لقيناك والليلة قنصنا ليك، وكنت مستمتع جداً بزيارتهم).
كيف تتقبل أسرتك هذه المداهمات؟
زوجتي نورا عوض، لديها قدرة خارقة على تحمل مسؤولية المنزل، وهي كانت ممثلة، وتعرفتُ عليها في المسرح، فهي متفهمة قصة المعجبين والمعجبات.
ما تأثير وجود الممثلة فضيلة في الفرقة؟
كل أعضاء الفرقة هم سبب نجاح فضيل، وعلاقتي بالممثلة ماجدة أكثر من 20 سنة في المسرح منذ فرقة سنبل، والممثل عبدالرحمن مالك هو من اكتشف ثنائيتنا أنا وماجدة.
أكثر شخص يضحكك أثناء التصوير؟
البلولة.
شخص يتعبك في فهم الأدوار؟
هشام جاد كريم في الحلقات الآخيرة مثل دور رجل المباحث، هشام زول فنان جميل، لكن وقت التصوير بقعد ويقرأ النص مية مرة واشرب القهوة ويولع السيجارة حتى يحفظ النص، بتعب نفسه وبتعبنا نحن معه خصوصاً في تغيير الشخصية .
ممثل تخاف من ظهوره إلى جانبك ويخطف الأنظار منك؟
لا أخاف، بالعكس أنا زول ديمقراطي جداً وعندما اصعد إلى المسرح وأرى شخص احساسه أعلى مني وجاذب الجمهور بستمتد بنجاح غيري فهو نجاحي أنا ايضا، وفي الآخر يقولون فرقة فضيل.
فضيل علاقتو بالرياضة شنو؟
اصلاً علاقتي بالرياضة ضعيفة وزمان كنت بلعب كورة، وكنت زمان هلالابي، ولكن مع ظروف الحياة بعدت عنها، ولو سألتوني حارس الهلال منو والمريخ منو والله ما بعرفهم.
لماذا لم تظهر في الثورة المجيدة؟
أنت كفنان لا تمارس السياسة، والثورة مسيسة وتذهب بكرة، وأنا طارح نفسي كمواطن سوداني يعالج قضايا مجتمعه وليس السياسة.
قبل فترة قلت لا شكراً حمدوك.. لماذا؟
(حمدوك عذبنا وطلع روحنا ذاتو) ولا شكراً حمدوك هسي تاني، وهذا رأيي كمواطن سوداني يعاني من الأزمات الاقتصادية، والحكومة الحالية أسواء حكومة مرت على السودان، مشكلتنا في السودان سياسين، ونحن من الاستقلال في زول (عشق) البلد دي خلف وخلاها ماشين وراء بس اصلوا قدام مافي.
هل تقف في صف العيش؟
لالا نهائي لكن بقيف ولدي وبتي، ولا استطيع الوقوف في الصفوف، لأنني مريض بقضروف في (5) فقرات.
كيف قضيت 2020م؟
هذا العام عام ضيق وكوارس، ولكن نحن كمجموعة فضيل انجزنا فيها كثيراً، ووصلت لجمهور كبير والحمدلله، والسنة دي معاي كويسة شديد والحمدلله، والفضل لا برجع لوزارة الثقافة ولا الحكومة ولكن للجمهور والسوشال ميديا، والدراما السودانية ينتجها الجمهور والله بمشي اصور في بيوت ناس بكرمونا لمن اخجلونا.
فضيل درست جامعة؟
نعم تقنية معلومات جامعة جوبا وحالياً نسيت “الويرد”.
فضيل عندك كم بنطلون؟
اتنين وبدلة اشتراكية.
من يختار ملابسك؟
بجيبها مليوة، ولا بشاركنا بجيبها وبحاسبنا، وذوقه كويس في اللبس، وعشان امشي السوق مشكلة مرة قلت ماشي السوق الشعبي جيت راجع.
لماذا رجعت؟
ركبنا موتر في نص الشارع (سكونا ناس بحافلة وقفونا اتصورو معانا، اها مشينا شوية وقفتنا أسرة في بكسي سلموا علينا، طلعنا ماشين على شارع كرور وقفنا واحد بعربية قربنا ندقشه قال لينا انا بفتش فيكم لي زمن مشينا شربنا الشاي، كل الناس في المحل جوا اتصوروا معاي، اها قلت ليهو جيب الموتر رجعني البيت)
اتقصد أن الشهرة والنجومية قيدت حريتك؟
حرية دي تاني مافي ولكن أنا مستمتع بجمهوري، وبحبهم شديد.
فضيل وعلاقتك بالفن الغنائي؟
يا سلام دا المتعة، وفي اوقاتي الخاصة بغني للراحل أحمد المصطفى، منذ صغري.
عندما تكون سعيد ماذا تفعل؟
بضرب لصديقي سعيد، وهوعُشرة عشرين عاماً.
الدخول لفرقتك هل يحتاج واسطات؟
لا.. موهبتك هي التى تقودك، وكل زول حبابوا ألف.
أكثر عائد مادي تحصلت عليه من قناة اليوتيوب؟
والله ما عارفوا كم، وفي شخص مسؤول منه وبدينا حقنا.
أعلى عداداتك؟
لا والله معليش دا زي عمر البت ما بكلمكم بيهو.
من ينافس فضيل ؟
أبوبكر فيصل شدة ما معجب بيهو متمنى اشتغل أعماله، بالإضافة للمثل محمد عبد الله دا كمان عادل أمام السودان ولحد الآن ما بقدر اقيف قدامه في المسرح.
الظواهر السالبة في العاصمة ؟
اللبس الحلاقة وجراءة الشباب، والألفاظ البذيئة ومافي حكومة، والشعب يحكم نفسه بنفسه، وكضاب البقول الحكومة بتحكم، وهيبة القانون عندما تفتقد في دولة طبيعي تكون في ظواهر.
الألفاظ الغريبة بتجيبها من وين؟
هذه مصطلحاتنا في البلد، (الهبوب التقد نعالك) وغيرها، والهبوب دي عندها قصة ظريفة مع الشاعرة نضال حسن الحاج، اتقابلنا في شغل وقالت لي 🙁 يا فضيل ما عارفة اعمل فيك شنو؟ ولدي بقرأ بقروش خيالية، في مدرسة أجنبية لكن لما يجي من المدرسة برمي الشنطة وبقول لي الهبوب التقد نعالك) لها التحية.
أنت دعاي وبتنبز أفراد فرقتك… ما السر؟
ما مني أنا لكن النص بجيني جاهز، بضيف عليه طريقتي الخاصة.
أنت صوفي؟
بحب الصوفية وأهلي صوفية، حالياً ما تابع لطريقة معينة، لكن طريقتي برأي بصلى على النبي وبستغفر بس وشايل سبحتي في أي محل.
علاقة مجموعة فضيل بالنظام السابق؟
زمان طلع فيديو وقالوا أنا كوز وما جيت القيادة العامة، لحدى ما جيت القيادة وسحبوا الفيديو، وبعد شوية بطلعوا فيديو بقولوا انا حرية وتغيير، انا اشتغل معاهم عروض فقط ولا كنت بقول الكيزان سمحين ولا كعبين، ولازم اشتغل مع الحكومة الماسكة، ولا حصل شكرت المؤتمر الوطني.
هل يمكن نشاهد فضيل في شخصية “ود ميكي”؟
صعبة انا راجل كبير وصلعتي لنص رأسي، ولا ارفض ود ميكي فهو شهادة عربية أوتربية حبوبات، ولا يحتك بالمجتمع ، وهو بني ادم ويتعايش بالمختصر ما زول كعب.
فضيل بتأكل بالشوكة والسكين؟
ها زولة شوكة شنو أنا جربتها مرة واحدة غلبني اشيل اللقمة وجدعت الشوكة والسكينة، بعدين الله ادانا خمسة أصابع لشنو؟.

المواكب