آمنة رحمة تجتر ذكريات ثورة ديسمبر من بربر
إلتقاط : سودانية نيوز
١٩ ديسمبر 2018
الساعة ٨:٠٠ ص بربر
الترس:
مالقيت مواصلات والترحيل اتأخر.. لقيت عربية وقفت.. ماشة وين.. المستشفى.. اركبي اوصلك.. وصلتا الصينية شفتا إطارات مولعة والسماء كلو دخان اسود على مد البصر.. في شنو؟. . مظاهرات.. وقف يابتاع الفيستو.. الليلة مافي طريقة تخش او تطلع ارجع بيتكم.. معاي بت ماشة شغلها في المستشفى.. أطفال عمر ٨ معاهم كبار كل الأعمار.. انزلي يابتنا اقطعي الترس بي رجولك.. عشان الترس مابينشال.. يعني شنو ترس..؟؟..
نزلتا مشيت ١٠ متر بي رجولي.. لحقني بتاع العربية وواصلنا.. دخلتا المستشفى لقيت كمية من اولاد وبنات الثانوي.. مالكم في شنو.. انتي المهندسة؟.. ايوا في ناس مضروبين رصاص.. عايزينك تشغلي الاشعة سرعة.. جرينا.. ٨ من طلاب الثانوي مضروبين رصاص في الساق.. مضروبين بعناية وفي نفس المكان ونفس السنتمترات.. قناص
كمية من الدموع… الصراخ.. الألم.. مع كمية من الاصرار والشجاعة… في شي بيحصل يا آمنة.. في شي ماطبيعي ..
وفجأة مواطنين غاضبين وهتافات من كل مكان.. ماكور
رصاصة في الرأس… ماكور مات
عطبرة سمعت بي ماكور طلعت الجامعات.. المدارس.. المؤسسات.. السوق… البيوت… تغير الهتاف.. تغير الزمان والمكان….
١٩ ديسمبر 2018
الساعة 1:48
الدم قصاد الدم
عبارة اول مرة اسمعا كان في اليوم دا.. من الكبير والصغير.. بعد موت ماكور.. وانا في الترحيل راجعة البيت كل البيوت خلال رحلة العودة.. بيهتفو كدا.. يعني شنووو؟ يعني زي ما كتلونا نقتلم؟ .. مستحيل.. اكيد عندها معنى تاني.. لانو دي ما وشوش تقتل.. طول عمرنا شعب طيب.. بنقدس الدم والروابط الإنسانية.. الإجابة علي تساؤلاتي جات سرعة.
نزلت من الترحيل لقيت في حافلة واقفة.. السواق قريبنا.. في شنو يا اباذر.. مالكم ماشين وين.. ماشين عطبرة.. في زول عيان؟
لالا ماشين نحسم الفوضى.. الطلاب اتضربو رصاص وفي موت و دم.. ماشين قيادة الجيش وأمانة الحكومة.. ماشة عطبرة انا.. يازولة نحنا يمكن نجي بعد صلاة العشاء.. المظاهرات هناك مدورة.. ماشة اتظاهر انا.. اركبي..
لما وصلنانقطة تفتيش الأمن الغذائي لقينا الجيش منتشر.. نزلونا كملنا بي رجولنا مسافة كيلو او اقل.. وشفتا العجب العجاب.. شوفتا السودان لابس لبس المدرسة قميص ابيض وبنطلون اسود وشايل شنطة ضهر.. شوفتا السودان بيهتف.. الدم قصاد الدم.. شفت المبنى الفخم.. مبنى المؤتمر الوطني.. مهد الزل ومرتع الانجاس.. قلم الظلم.. تهوي عليه زجاجات الملوتوف.. يحترق.. ومع كل سقوط نافزة يسقط من قلوبنا الخوف..تسقط الأنا.. تسقط المحسوبية.. ويعلو السودان.. من هنا من عطبرة.. يتبع
