جانا الشتاء .. داليا الياس

أنا مؤمنة تماماً إنو نحن البنفع بعض ونحس بى بعض ونساعد بعض كشعب أكتر من أى حكومة!!

ودائماً بقول ليكم البلد بتتقدم بى ناسها… والمجتمعات بتتحسن بالتكافل… والأوطان بتتطور بالتنمية البشرية والثقافات والمبادرات الإنسانية.

عشان كده بتحمس لأى عمل طوعى وخيرى مع أى جهه طالما فيهو فائدة لفئة محتاجة…
وهو منو الما محتاج حالياً مع ظروفنا دى؟!!

دحين… الشتاء دخل وإتوهط!!

وكتااار المحتاجين البيسترهم ويدفيهم…
ونحن قادرين بأذن الله ندفى بعضنا بى بعضنا.. ونكافح الزيفه والبرد…

مجموعة جانا واحدة من المجموعات الطوعية النشيطة جداً فى توطين مفهوم العطاء والتكافل.
ليها 7 سنة شغالة فى كسوة الشتاء وتوفير الأغطية لطلبة الخلاوى وغيرهم.

والسنة دى دشنت الحملة بدعم ورعاية كريمة
من (جهاز المخابرات العامة) و(جمعية البحرين للعمل الطوعي) بحيث تمكنت من توزيع بطاطين لعدد من الخلاوى فى ولايات السودان المختلفة.

على سبيل المثال.. ولاية شمال كردفان:
خلوة الشيخ موسي فكي بالمزروب، وخلوة جنان بالقلابات بولاية القضارف، وخلوة اللعوتة وأم مغد بولاية الجزيرة، إضافة لعدد من الخلاوي بولاية الخرطوم :
خلوة سدرة المنتهى بالريف الشمالي بمحلية كرري قرية النوفلاب الغربية، خلوة الصالحة جنوب محلية أمدرمان ‘خلوة مسيد الشيخ العبيد ودبدر أم ضوبان بمحلية شرق النيل.

وصادف تدشين الحملة فعاليلت الإحتفال باليوم العالمي للتطوع والذى إستهدفت جانا عبره عدد من الطلاب المكفوفين بالجامعات ووفرت لهم كذلك بالتعاون مع ( جهاز المخابرات العامة) عدد من العصى البيضاء لتعينهم على الحياة.

من تلك الجامعات جامعة الخرطوم وجامعة النيلين وجامعة بحري.

وبما إنى تشرفت بالوقوف على تفاصيل المبادرة فحابة أشيد بالقائمين عليها وحرصهم على التفاصيل بما فيها إبتكار نظام معين للتأكد من وصول كافة المسلزمات لمستحقيها بشكل محترم ونبيل يحفظ كرامتهم.

وتأكدت بما لايدع مجالاً للشك أننا قادرين على تحقيق إنجازات كبيرة حالما أخلصنا النية وإعتمدنا على ذاتنا وخلقنا شراكة معتبرة على الصعيدين الرسمى والشعبى مع جهات تعنى بالمسؤولية المجتمعية كما يجب.

بس الأمر محتاج حماس ورغبة أكيدة وفريق عمل متجانس ومؤمن بنفسو وأهدافو.

والعملتو جانا كلنا قادرين نعملو فى أى مكان من السودان…. فياريت ننشط فى مكافحة الشتاء ودرء آثاره عن الأسر المتعففة…
وما أظن فى زول مننا ممكن يتأخر عن تلبية نداء الخير وين ما كان.

ربنا يبارك الجميع ويهون كل القواسى

بى خيرك دفي غيرك